Personaggi: Dario Paterlini

Testo di Giuseppe Mezzadri

 

 

Dario Paterlini

(1925 – 2007)

Dario Patarlén, simpatich parsonag’ pramzàn, l’éra nasù in via Bixio, dal pärti äd porta San Fransessch chi ciamävon bocalérja parché gh’ éra stè ’na fabrica äd bocäl da nota.

Äd l’ Oltretorént l’à respirè l’arja, j umór, i valór, i difét e la béla verve pramzàna. L’ à spartì con la so génta la mizérja che in chi témp là l’éra granda bombén.

La so masima l’ariss podù ésor: “A j ò pran ridù in-t-la vitta… e magnè poch!”.

“Cuand a s’ pärla ’d Pärma vécia… a m’ grat ancorra!” a dzäva Dario ch’al gh’ äva avù, cme in tant alóra, i pjóc’.  “Indo’ a t’ spura?” a gh’ é dmandäva so nona intant ch’ j al preparävon par la crézma. E, indo’ al sgnäva, j al frisjonävon col pétroli, ch’ al n’ éra miga l’acua ’d rózi, in manéra ch’ al ne s’ gratiss miga in Dom. Al s’è miga gratè mo tutti i gh’ stävon ala lärga.

Dario al gh’äva un umorizom fat äd batudi brilanti, spess ezagerädi mo mäi ripetitivi. Millit äd la Pubblica Asisténsa, corista ’dla Verdi, l’éra generóz e amigh con tutti. “In Coräla, cuand a n’ gh’éra miga Dario, l’éra ’na coza disspra”, a cóntäva un so véc’ amigh corista.

A chi témp là, a cavàl ädla guéra, in-t-il ca di bórogh l’éra facil che äd cesso a gh‘ nin fuss sól che vón par pjàn acsì, äd nota, a s’ droväva i bocäj e, col scur, a podäva anca capitär chi se strabuchisson. L’è gustóza la descrisjón ädla so ca, che Dario al fà ala so manéra.
“Par ca, a gh’éra sémp’r odór äd fort! E cuand a gh’éra l’arja basa, il scäli i spusävon cme di rognón. In ca mejja a säva äd fréscumm finna i mataras”. E ’l continväva: “A gh’éra di scarafas milenäri chi parävon scärpi äd varniza e dil pónghi con di barbiz acsì che, s’ a t’ ghé däv la man, i t’ compagnävon finna in ca. I gat, putost che fär bujja, i dvintävon amigh”. E po ’l dzäva: “A séra bél mi, da ragas, a paräva un cummor. A gh’ äva sémpor la candéla al näz, a m’puliva anca in-t-il bräghi acsì a gh’ gnäva la coraméla e, a l’ostaria, i gh’ piävon i solfanéj”.

Al gh’ äva sémpor vója ’d magnär: i so amigh i gh’ävon miss nomm Fama. A séguita a dir Dario: “A ca mejja finn’ il moschi i gh’ävon il bocaróli* e, d’ogni tant, i dävon zo dala deblessa”. Dop la scóla al lavoräva con so pädor ch’al fäva al muradór. “Gran bél bicér me pädor! Va là ch’ al n’ à bvu, e tutt ròss, parchè al bjanch al fà pu mäl ala saluta”.

D’ogni tant al véc’ al se zlontanäva dal lavór e al ghé dzäva: “S’ i m’ sércon a vén indrè fra déz minud, a vagh a fär dilj amzuri!” Nazè ’l stras, in séguit Dario al gh’andäva adrè a fär dilj amzuri. Acsì l’à podù conossor j ostarii ’d Pärma vécia.

* Tagli agli angoli della bocca dovuti spesso a malnutrizione, carenze di ferro, zinco o di vitamina B12

 

Anni ’70, via Turchi, di fronte alla vecchia sede di Parma Lirica.

Il gruppo si divertiva, di quando in quando, a fare il giro

delle osterie o dei ritrovi.

Dario Paterlini è il secondo da destra;

Giuseppe Mezzadri il secondo da sinistra.

 

Assistenza Pubblica di via Nino Bixio

 

Lavandaie a Barriera Bixio. A destra l’antica porta San Francesco, sede oggi della Famija Pramzana e della Consulta per il Dialetto Parmigiano

 

Barriera Bixio. A sinistra un solitario viale dei Mille.

 

Porta San Francesco, oggi.