Poeti e Poesie:
Forsi…l’è mej acsì
di Bruno Lanfranchi
Una poesia per meditare, riflessioni su bambini mai nati.


Bruno Lanfranchi, Al me Zarden, Azzali, 1991
Forsi… l’é mej acsì
La me vitta incó l’é incominciäda
e i me purtrop in n’al san migh ancòrra,
i las’n indifarént che ’l témp al còrra
e ’l porta a compimént la so coväda.
A són tant picén ch’a ne m’vedd gnan da mi,
però a m’al sént, v’al giur, d’ésor za MI.
Sibén che p’r al momént són poch pu ’d gnénta,
a so za par sicur ch’sarò ’n mas’cètt
e ch’corarò p’r i pre cme ’n vér diavlètt,
aleg’r e zvelt da fär voltär la génta.
In quindoz gioron són carsù ’n pochén,
mo par far quél da mi l’é ’n po’ prestén;
l’ é la me mama p’r adésa ch’ lavóra,
sénsa savär ch’ són chi sotta ’l so cór…
la m’ còvva adäzi, con al so calór,
la m’ papa coll so sangov, la m’adora.
Mädra natura in vint gior’n apén’na
l’ a za dé fórma a la me bochén’na.
L’ à da ésor bél, magnär quand a s’à fama…
Cantär, riddor, parlär, con la so bocca…
L’é ’na coza che veramént la m’tocca,
quand par la primma volta dirò: – Mama! –
Cme ’na briza són gros… co’ digghja… mo gnàn…
Ma anca ’na briza n’ éla miga PAN?
Incó ch’j ò za compì vintidù gioron,
gh’ò dentor quél ch’a comincié a piciär;
al me cór, con di cólp tutt regolär,
al m’à scaldé par bén cme dent’r a ’n fóron.
Par mólt ani a són sicur ch’al sentirò
e quand al sarà strach, mi a morirò.
Mólt témp, purtrop, gh’à ancòrra da pasär,
par corror in-t-i bras äd la me mama
ch’la m’ cantarà il cansón par fär la nana
e in pónta ’d pe ’l papà ’l m’gnirà a bazär.
Quand du i s’volon bén, n’ él migh meraviglioz?
Mi són al pu bél butt ad la pianta di spóz!
Quaranta gioron j én volé via cme ’l vent
e incò me madra l’à savù dal dotor
ch’ la gh’ à un fior ch’ stà par sbocciar sott al so cor.
Cos’ arala sentì? Mi son tant content!
Chi poch mez ch’ a m’ resta, prest i passaran,
po’ finalment la caressa dill tò man.
Du mez é passé e la me facen’na
l’é zà formada con j’ ocen tutt friss
chi podrisson veddor se qualcdon ’m j’arviss.
Mo i s’arviran da lor, fuss admaten’na.
I s’arviran int un zarden pien ’d fior.
I vedran l’arcobaleno e i sò color.
Lor in n al san migh ch’ a son un mas’cien
e forsi i se spetton ’na femnen’na;
gnan mi ’n sò miga se la me facen’na
l’ è bianca e rosa oppur sa son nigren.
Am piasriss tant che i bianch e i nig’r ad pela
i se sfamiss’n int la stessa scudela.
Incò j’ ò sentì batt’r al to cor pianen
e tutt du insemma i s’én miss a scrivvor
al pù bel diäri mai scritt sora ’n libor;
un dialog tutt mutt ad ’na mama e ’l fiolen.
J’ én tutti paroli ch’ ven fora dal cor,
chi nasson soltant dal pu grand ädj amor.
Al so, cara mama, p’r aver un puten
l’ é un gran tribuleri, gh’ é molt da soffrir;
tant brav dotor un aiut i t’ pol’n ofrir,
cme quand i Re Magi j én andé dal Bambén.
Quand po ’t saré vecia e t’ vre riposar,
mi s’rò ’l tò baston da poder’t apogiar.
E se un qualc malné gnirà in sta tera
ch’a vist a nasser tutt i me parent
par färsla da padron cme ’n prepotent,
nuetor tutt unì ’ndremma a la guera!
S’occorra anca coll sanggov la bagn’remma
e par l’eternité staremma insemma!
Ahhii!!… Parché mama, ét parmiss che al dotor
al fermiss al me cor? O sit stada tì?
Al treno ’d la me vitta l’è partì
e l’ à porté con lu tutt i dolor!!!
L’era bel al mond dedchì…
Mo forsi… l’é mej acsì!
Recitata dallo stesso Bruno Lanfranchi
Forse… è meglio così
La mia oggi vita è cominciata
e i miei purtroppo non lo sanno ancora,
lasciano indifferenti che il tempo corra
e porti a compimento la sua covata.
Sono tanto piccolo che non mi vedo nemmeno da solo
però me lo sento, ve lo giuro, di essere già IO
Sebbene che per il momento sia poco più di niente
so già per sicuro che sarò un maschietto
e che correrò per i campi come un vero diavoletto,
allegro e svelto da fare voltare la gente.
In quindici giorni sono cresciuto un pochino,
ma per fare qualcosa da solo è un po’ prestino;
è la mia mamma per adesso che lavora,
senza sapere che sono qui sotto al suo cuore…
mi cova adagio, con il suo calore,
mi da la pappa con il suo sangue, mi adora.
Madre natura in venti giorni appena
ha già dato forma alla mia bocchina.
Deve esser bello, mangiare quando si ha fame…
Cantare, ridere, parlare, con la propria bocca…
È una cosa che veramente mi tocca,
quando per la prima volta dirò: – Mamma! –
Come una briciola son grosso…cosa dico…ma nemmeno…
Ma anche una briciola non è PANE?
Oggi che ho già compiuto ventidue giorni,
ho dentro qualcosa che ha cominciato a picchiare:
il mio cuore, con dei colpi tutti regolari,
mi ha scaldato per bene come dentro ad un forno.
Per molti anni sono sicuro che lo sentirò
e quando sarà stanco, io morirò.
Molto tempo, purtroppo, deve ancora passare,
per correre tra le braccia della mia mamma
che mi canterà le canzoni per fare la nanna
e in punta di piedi il papà mi verrà a baciare.
Quando due si vogliono bene, non è meraviglioso?
Io sono il più bel butto della pianta degli sposi!
Quaranta giorni sono volati via come il vento
e oggi mia mamma ha saputo dal dottore
che ha un fiore che sta per sbocciare sotto il suo cuore.
Cosa avrà sentito? Io sono tanto contento!
Quei pochi mesi che mi restano, presto passeranno
poi finalmente la carezza delle tue mani.
Due mesi sono passati e la mia faccetta
è già formata con gli occhietti tutti vivaci
che potrebbero vedere se qualcuno me li aprisse.
Ma si apriranno da soli, fosse domattina.
Si apriranno in un giardino pieno di fiori.
vedranno l’arcobaleno e i suoi colori.
Loro non lo sanno che sono un maschietto
e forse si aspettano una femminuccia;
anch’io non so se la mia faccetta
è bianca e rosa oppure se son negretto.
Mi piacerebbe molto che i bianchi e i neri di pelle
si sfamassero nella stessa scodella.
Oggi ho sentito battere il tuo cuore pianino
e tutti e due assieme si sono messi a scrivere
il più bel diario mai scritto sopra un libro;
un dialogo tutto muto dei una mamma e il figlio.
Son tutte parole che vengono fuori dal cuore
che nascono soltanto dal più grande degli amori.
Lo so, cara mamma, per avere un bambino
è una grande tribolazione, c’è molto da soffrire;
tanti bravi dottori un aiuto te lo possono offrire
come quando i Re Magi sono andati dal Bambino.
Quando poi sarai vecchia e ti vorrai riposare
io sarò il tuo bastone da poterti appoggiare.
E se un qualche maledetto verrà in questa terra
che ha visto nascere tutti i miei parenti
per farsela da padrone come un prepotente,
noi tutti uniti andremo alla guerra!
Se occorre anche col sangue la bagneremo
e per l’eternità staremo assieme!
Ahhii!….Perché mamma, hai permesso che il dottore
fermasse il mio cuore? O sei stata tu?
Il treno della mia vita è partito
e ha portato con sè tutti i dolori!!!
Era bello il mondo da qui…
Ma forse… è meglio così!